Lazio, pas festës së Champions Igli Tare shtrohet në spital

Probleme shëndetësore për Drejtorin Sportiv të Lazios, Igli Tare. Pak orë pas festimeve të zgjatura për vendin e tretë që siguron kualifikimin në Champions League, ish sulmuesi shqiptar është detyruar të shtrohet në klinikën Paidea të Romës pasi u diagnostikua me pneumoni. Paidea është një prej klinikave më të specializuara të Romës ku prej vitesh ndiqen edhe rastet e dëmtimeve të lojtarëve të skuadrës bardhekaltër.

Pas shtrimit në repartin e terapisë intensive, Tare u kurua me antibiotikë dhe pas stabilizimit të gjendjes doli nga klinika. Sipas mediave pranë klubit italian, drejtuesi i lartë shqiptar i Lazios u transferua në banesën e tij ku do të qëndrojë disa ditë për t’u kuruar plotësisht. Kualifikimi i Lazios në fazën paraeliminatore të UEFA Champions League është një nga arritjet më të mëdha të këtij klubi që prej emërimit të Igli Tares në postin e Drejtorit Sportiv dhe gjatë ditëve të fundit ecuria pozitive e Lazios në Serie A ka bërë që mediat e vendit fqinjë t’ia adresojnë një pjesë të meritës edhe ish sulmuesit të Kombëtares Shqiptare.