“Loro Boriçi” pas me kohën, Serbi-Shqipëri mund të luhet në Elbasan

Puna në stadiumin “Loro Boriçi” vazhdon. Natyrisht që sa u takon ritmeve me të cilat punohet, nuk mund të themi me saktësi nëse janë aty ku duhet për të kapur afatin kohor të përcaktuar për përfundimin e tij apo jo. Kjo, sepse pikësëpari, nuk ka një tabelë ku të shfaqet projekti i plotë, vlera e investimit, firma ndërtuese, investitori, data e fillimit të punimeve dhe ajo e mbarimit, ashtu siç ndodh zakonisht kur ndërtohet një objekt. Për më tepër, një objekt i një rëndësie të veçantë, siç është ky stadium.

 Rreth 50 punëtorë që po merren me punimet, po mundohen t’i bëjnë sa më shpejt të jetë e mundur procedurat e shtrimit të hekurit dhe të armaturës për hedhjen e betonit në bazamentin e tribunës qendrore. Një proces i tillë me shumë siguri do të zgjasë deri në ditët e para të qershorit. Më pas firma ndërtuese do të ketë katër muaj kohë në dispozicion, për ndërtimin e tribunës së re, të tribunës pas porte, në rregullimit të të gjitha ambienteve brenda dhe jashtë stadiumit.

Ndërkohë, janë hequr dy prej kullave të ndriçimit, të cilat fillimisht u tha se do shkonin në “Selman Stermasi”, por në fakt, vazhdojnë të jenë të çmontuara në pistën e “Loro Boriçit”. Natyrisht që do vihet sistemi i ri i ndriçimit dhe po ashtu do të shtrohet edhe tapeti i ri i fushës dhe bashkë me të do të bëhet edhe dranazhimi i saj. Këto procese kuptohet që duan kohën e vet, e cila në fakt nuk është në favor të mbarimit në kohë të punimeve, në mënyrë që më 9 tetor Shqipëria të presë Serbinë në këtë stadium.