Massimiliano Allegri, rinovim kontrate dhe dyfishim i pagës

Sezon fantastik i Juves. Kampion i Seria a, si dhe finaliste e UEFA Champions League dhe e Kupës së Italisë. Nga vërshëllimat e muajve të verës në Vinovo në finalen e Berlinit. Sezoni i parë i Massimiliano Allegrit te Juventusi ka ardhur gjithmonë në rritje dhe mund të mbyllet në mënyrën më të mirë të mundshme. Te Juventusi janë shumë të kënaqur me punën e trajnerit që në fillim të sezonit pasoi në drejtimin e skuadrës Antonio Conten dhe drejtuesit siç edhe e ka bërë shpesh të ditur drejtori i përgjithshëm i bardhezinjve, Beppe Marotta nuk dëshirojnë të fillojnë sezonin e ri me një trajner në skadencë kontrate.

Marrëveshja aktuale e Allegrit me Juven përfundon në Qershor të 2016-s, dhe në shtëpinë bardhezi kanë nisur që tani punën për rinovimin e kontratës me trajnerin livornez. Së shpejti do të realizohet një takim mes Allegrit dhe drejtuesve ku me siguri trajneri 47-vjeçar do të hedhë firmën mbi kontratën e re. Dy janë mundësitë, e para rinovimi deri në vitin 2018 dhe e dyta që Allegri të firmosë deri në 2017-n me opsion zgjatjen e kontratës edhe për 1 vit tjetër. Sigurisht që nga marrëveshja e re ish tekniku i Milanit do të përfitojë një rritje page. Nga 2 milionë Euro që derdh në llogarinë e tij aktualisht Allegri që nga sezoni i ardhshëm do të fitojë 3,5 milionë Euro në vit. Një shpërblim i merituar ky për Max Allegrin duke parë sezonin e shkëlqyer që ka zhvilluar Juventusi. Bardhezinjtë përveçse kanë fituar kampionatin për të 4-tin vit radhazi kanë siguruar edhe dy finale atë të Kupës Italisë dhe mbi të gjitha të Uefa Champions League.