Mërgjyshi: Fitimi i Superkupës do të ishte një ogur i mirë për sezonin e ri

Trajneri i Laçit, Artan Mërgjyshi do të nisë sezonin e ri me finalen e Superkupës së Shqipërisë. Trajneri që zëvendësoi Besnik Prengën, pas angazhimit të bardhezinjve në Europa League, u rikthye në stolin e një skuadre elitare pas një pauze të gjatë dhe arsyet lidhen me projektin dhe filozofinë e klubit.

“Këtu në Laç ka vite që kanë një skuadër aktorë dhe faktorë në Superligë. Klubi bazohet te djemtë e rinj, të cilët duan të promovohen. Trofeu është në derë, duhet ta luajmë një 90-minutësh. Skuadra ka shumë ndryshime nga sezoni i kaluar, ashtu si edhe kundërshtari. Nuk mund të hysh në një garë apo në një ndeshje për trofe po nuk besove. Vetë grupi e ka këtë frymë të mbartur nga më përpara”, deklaroi Mërgjyshi për Super Sport.

Trajneri i kurbinasve nuk preferon të flasë përpara kohe për objektivat sezonal.

“Është për ta falënderuar presidentin, sepse nuk është nga ata që të vendosin në trysni pa sistemuar ekipin. Deri ku do të shkojmë do ta shohim rrugës”.