Ofendoi arbitrin në fushë, Disiplina dënon me 3 javë mbrojtësin e Interit

Nuk kanë fund telashet për Interin e Contes pas barazimit 3-3 ndaj Sassuolos. Mbrojtësi Milan Skriniar do të mungojë për tri javë, për shkak të një dënimi nga Gjykata Sportive, pasi dje mori dy kartonë të verdhë.

Në motivacionin e dënimit thuhet se lojtari është ndëshkuar dy herë me karton të verdhë brenda 90 minutave dhe ka përdorur shprehje fyese e blasfemike, para se të linte fushën e lojës i detyruar.

Mbrojtësi zikaltër kreu një ndërhyrje të panevojshme në minutat shtesë të sfidës, për më tepër në një zonë të fushës ku kundërshtari nuk mund ta rrezikonte, ndërsa tani do të penalizojë ekipin duke qenë se edhe kalendari është mjaft i ngjeshur.

Kujtojmë që përveç Skriniar, në sfidën e radhës ndaj Parmës do të mungojë edhe Antonio Conte, i cili dje ka marrë një tjetër karton të verdhë dhe ka plotësuar numrin e tyre.