Pezullimi i kampionatit, Tirana organizon menjëherë miqësore me Korabin

Pas vendimit për pezullimin e Superiores, skuadrat e Superiores po mendojnë që në fundjavë të luajnë sfida miqësore. Klubi i Tiranës ka njoftuar në faqen zyrtare se të premten, në orën 14:00, në “Selman Stermasi” bardheblutë do të zhvillojnë një test miqësor me Korabin dhe të gjithë të apasionuarit e klubit kryeqytetas, që duan ta ndjekin nga afër skuadrën e zemrës, mund ta bëjnë falas, pasi dyert e stadiumit do të jenë të hapura.

Pezullimi i kampionatit, për shkak të dhunës ndaj gjyqtarit Eldorian Hamiti, erdhi në një moment shumë pozitiv për Tiranën, që në 7 takimet e fundit në Superiore kishte arritur 4 fitore e 3 barazime, i fundit në derbi me Partizanin dhe me dominim në fushë.