Pitana, arbitri që vendos drejtësi në ndeshjen hapëse të Botërorit

Argjentinasi Nestor Pitana do të arbitrojë ndeshjen e parë hapëse të Kupës së Botës, e programuar për t’u zhvilluar mes Rusisë dhe Arabisë Saudite, në stadiumin “Luzhniki” në Moskë, në orën 17:00.

Ai do të asistohet nga Juan Pablo Bellati dhe Hernan Maidana, ndërkohë që braziliani Sandro Ricci do të jetë arbitri i katërt. Pitana është një nga gjyqtarët më me përvojë në amerikën-latine. Ai ka gjykuar Francë-Gjermani, çerekfinalen e Kupës së Botës 2014. Ai drejtoi edhe gjysmëfinalen e Lojërave Olimpike në Rio, Gjermani-Nigeri si dhe gjysmëfinalen e Kupës së Konfederatave në vitin e kaluar, Gjermani-Meksikë.

Për herë të parë në historinë e Botërorit në “Rusi 2018” do të aplikohet edhe sistemi VAR (moviola për episodet më të rëndësishme). Në takimin takimin hapës në regjinë e VAR-it do të ulen italianët Massimiliano Irrati dhe Daniele Orsato, argjentinasi Mauro Vigliano dhe kiliani Carlos Astroza.