Po shkëlqen me Tiranën, sulmuesi i bardhebluve dënohet në Angli për trafik droge

Telashe në Angli për sulmuesin e Tiranës, Michael Ngoo. 25-vjeçari ka dalë para gjykatës në Chelmsford pasi akuzohet për shpërndarje të dograve të lehta në vitin 2016. Ngoo u kap në flagrancë për shpërndarje të oksidit të azotit (gaz që simulon të qeshura) në një festival të madh të muzikës në Mbretërinë e Bashkuar.

Sulmuesi i Tiranës kishte shpërndarë substancën e ndaluar për personat që ishin duke festuar në Festivalin e 5-të në Hylands Park të Chelmsford në vitin 2016, së bashku me të pandehurin tjetër, Denzel Thompson. Ngoo u kap duke mbushur enët e vogla me substancën e ndaluar, disa prej të cilave i kishte shitur gjatë festës. Ish-sulmuesi i moshave të Anglisë dhe Thompson i kanë shpëtuar burgut, por i janë dorëzuar ligjit të komunitetit, raporton “Essex Live”.

Duke e gjykuar në një seancë dëgjimore të enjten (22 mars), Lucy Sweetland tha: “Një mbikëqyrës sigurie u alarmua dhe hyri në një tendë. Ai i pa ata të vepronin së bashku. Ngoo ishte duke mbushur enët e vogla me substancën e ndaluar. Ai dhe Thompson kishin nga një çantë shpine. Ishin paratë që kalonin tek ata pas shitjes së drogës. Roja vëzhgoi tetë deri në pesëmbëdhjetë transaksione parash brenda 10 minutave. Ata u arrestuan dhe kishin mes tyre 312 ‘fishekë’ të mbushura me substancën e ndaluar”.

Të dy telefonat e të pandehurve u konfiskuan. Në telefonin e Thomson gjetën mesazhe ku konfirmohej ideja për të furnizuar me drogë, personat që do të merrnin pjesë në festë. Ngoo kishte më shumë se 700 stërlina në xhep në momentin e arrestimit, ndërsa Thompson kishte 900 stërlina.

Në zbutjen e gjyqtarit Jonathan Seely, Karen Dempsey tha: “Do t’ju ftoja që të merrnit në konsideratë faktin që Ngoo nuk ka precedentë të mëparshëm në këtë aktivitet. Kjo është përvoja e tij e parë e sistemit të drejtësisë penale dhe ai bëri një gabim shumë të madh. Ai pranon se duhet të marrë përgjegjësinë për këtë. Do të donte të vazhdonte me profesionin e tij”.

Gjyqtari Seely tha: “Në të dy rastet tuaja, ndonëse dënimi me burgim do të ishte krejtësisht i përshtatshëm, gjykata duhet gjithmonë të marrë në konsideratë nëse një urdhër komuniteti mund të shërbejë për mbylljen e çështjes. Jam i bindur se do të jetë kështu”. Ngoo pritet të fluturojë në Shqipëri ditën e sotme, por në të njëjtën kohë duhet të pajtohet me dënimin: shërbim për komunitetin, punë e detyrueshme në periudhën kur ndodhet në Angli dhe do të paguajë gjobën prej 4 mijë stërlinash. Thompson gjithashtu duhet të pajtohet me punë vullnetare për katër muaj si dhe me gjobë, 250 stërlina.