Prishtina barazon në sfidën e parë, pranë kualifikimit në Europa League

Prishtina hodhi një hap të mirë drejt kualifikimit në ndeshjen e parë të para-eliminatoreve të Europa Leagues, teksa barazoi 1-1 në transfertën ndaj Europa Fc të Gjibraltarit. Kryeqytetasit e Mirel Josës u ndëshkuan në fundin e pjesës së parë me anë të një 11-metërshi, por arritën të rikthejnë baraspeshën sapo filloi pjesa e dytë.

Golin për bardheblutë e shënoi futbollisti i ardhur para pak ditësh nga Liria e Prizrenit, Meriton Korenica, në minutën e 50 të sfidës, pas ekzekutimit mjeshtëror të një goditjeje dënimi.

Ndeshja e kthimit luhet javën e ardhshme, ndërsa tashmë Prishtina është e favorizuar, pasi kualifikohet edhe me barazimin pa gola, për shkak të golit të shënuar sot në fushën kundërshtare.