Rusia paralajmëron banorët pranë stadiumit: Nëse dilni në ballkon, ju qëllojmë me snajper!

Rusia po përgatitet për kushte sigurie ekstreme në Kupën e Botës. Kështu banorët që jetojnë në blloqet e apartamenteve pranë stadiumit me kapacitetit prej 35 mijë vendesh, “Central Stadium” janë paralajmëruar se mund të qëllohen nga snajperët e policisë, nëse ata guxojnë të dalin në ballkonet e tyre gjatë ndeshjeve.

Një gardh i madh metalik prej tre metrash, është vendosur nëpërmjet një blloku apartamentesh duke bllokuar kalimin dhe hapësirat e parkimit të makinave. Synimi i organizatorëve është për të mbrojtur personalitetet dhe tifozët e shumtë që do të jenë të pranishëm në katër ndeshjet e grupeve që do organizohen në qytetin e katërt më të madh në Rusi duke filluar me ndeshjen e së premtes mes Egjiptit dhe Uruguait.

Njëri nga banorët deklaroi për Moscow Times: “Policia jonë vendase erdhi nëpër të gjitha banesat dhe na paralajmëroi se gjatë ndeshjeve ishte e ndaluar që të dilnim në ballkone, të hapnim dritaret tona ose të përdorim dylbi”.  Nëpër tarraca do të vendosen snajpera.

Zona përreth është gjithashtu duke u monitoruar nga afër nga kamera CCTV të vendosura kudo dhe policë të shumtë po patrullojnë rrugët dhe kryejnë kontrolle për mjete identifikimi.