Sadiku largohet si “hero” nga Lugano: Nga lufta për mbijetesë arritëm në Europa League

Armando Sadiku ndihmoi Luganon për të shkuar në Europa League, teksa mbërriti gjatë janarit kur skuadra po luftonte për mbijetesë. Skuadra ku aktivizohet sulmuesi shqiptar barazoi me rezultatin 3-3 ndaj Grashopërsit, që kishte kapitulluar prej kohësh.

Goli i parë i takimit erdhi pikërisht nga lojtari kuqezi. Tashmë Sadiku bën gati valixhet, për t’u rikthyer te Levante pas përfundimit të huazimit. Nëpërmjet një reagimi në “Instagram”, sulmuesi shqiptar nuk e fsheh kënaqësinë për ndihmën që i ka dhënë ekipit.

“Ja ku jemi në fundin e një kampionati tjetër. Unë erdha te Lugano në një kohë të vështirë, kur diskutohej dhe luftohej për mbijetesën. Por ne e menaxhuam situatën për të arritur grupet e “Europa League”, si dy vite më parë. Jam shumë i lumtur që kontribuova me tre gola shumë të rëndësishëm.

E vërtetë, nuk ishte e lehtë për mua që të kthehesha pas atij dëmtimi të gjatë dhe të luaja gjithmonë për 90 minuta. Por unë jam i sigurt se në çdo minutë në fushë, jap më të mirën për fanellën. Lojtarët e mëdhenj shihen pikërisht në këto situata”, ka thënë Sadiku.