Sadiku rikthehet me dy gola

Dy golat e shënuar në Kupën e Polonisë kanë ndihmuar Armando Sadikun që të kthehet përsëri vendimtar për skuadrën e Legias së Varshavës.

Sulmuesi i përfaqësueses shqiptare ishte lënë në hije gjatë javëve të fundit edhe për faktin se nuk po arrinte të gjente rrugën e rrjetës. Por në takimin e Kupës ndaj Bytovia ai shënoi 2 herë, në fillimin dhe fundin e ndeshjes, për të treguar se nuhatja para portës nuk i mungon.

“Çdo herë unë mundohem të bëj më të mirën, punoj dhe jap 100%. Çdo ditë e më shumë ndjehem mirë në skuadër. Në fillim gjithçka ishte e re për mua dhe kisha disa probleme të vogla. Tani, me trajnerin e ri, gjithçka po shkon mirë. Jam i lumtur me golat në ndeshjen kundër Bytovia, që na ndihmuan të fitonim dhe të shohim me optimizëm drejt raundit tjetër të Kupës së Polonisë”, tha futbollisti.

Ndeshja e mbrëmshme ishte shumë e veçantë, edhe për faktin se në pjesën e dytë, në stadium kishte një “black out” që detyroi ndalimin e sfidës për disa minuta. “Në karrierën time kam luajtur dy ndeshje gjatë të cilave kanë ikur dritat. Këtë radhë, gjithçka u riparua shpejt dhe ishim në rregull përsëri me 5 minuta nxemje”, tha Sadiku.