Shorti i Europa League, “buzëqesh” vetëm Kukësi

Teksa Skënderbeu pati fat në shortin e Nyonit për në Champions League, kjo gjë nuk mund të thuhet për Partizanin, Laçin dhe Kukësin në Europa League. Goglat e Nyonit ishin të pamëshirshme me Partizanin që do të përballet me norvegjezët e Stromsgodset të cilët sezonin e kaluar avancuan deri në raundin e dytë eliminator të Champions League por edhe në Norvegji vitin e kaluar luftonin për titull. Laçi do të ketë përballë Inter Baku, ekipin azerbajxhanas që ka investuar miliona dhe e mbylli në vendin e dytë sezonin këtë vit. Kukësi mund të ndihet paksa me fat pasi do të ketë përballë FC Torpedo Zhodino, bjellorusët që aktualisht janë në vendin e tretë nga fundi në kampionatin vendas. Ndeshjet e para do të luhen më 2 Korrik dhe që të trija ekipet shqiptare do t’i zhvillojnë në shtëpi takimet e para ndërsa pas 7 ditesh ato të kthimit në transfertë.