Skënderbeu dhe Partizani, dy testet që zbulojnë forcën e Tiranës

Viti 2019 ka nisur pozitivisht për skuadrën e Tiranës që ka marrë dy fitore dhe dy barazime në kampionat, duke dalë nga zona e ftohtë. Trajneri Mema nuk ka shprehur ambiciet për një vend në Europë, por formë aktuale e skuadrës të bind që të besosh në një objektiv të tillë, i cili mund të arrihet në kampionat, ose nëpërmjet Kupës së Shqipërisë.

Tirana vjen në rritje në krahasim me gjysmën e parë të sezonit, por për të provuar se mund t’ju dhurojë tifozëve diçka më tepër se qetësia e mbijetesës, do të shërbejnë mbi të gjitha dy takimet e radhës. Një përballje në Korçë me Skënderbeun dhe pastaj, derbi i shumëpritur me Partizanin.

Në Korçë padyshim që nuk gjen Skënderbeun e viteve të shkuara, megjithatë stadiumi atje mbetet një tabu për Tiranën, që nuk fiton transfertën me Skënderbeun prej plot 5 vitesh, një ndeshje që shërben për pikët, por mbi të gjitha për vetëbesimin dhe frymën që do të çojë bardheblutë në derbin me Partizanin.

Ajo do të jetë padyshim ndeshja e sezonit, një datë e fiksuar prej kohësh në kalendarin kryeqytetas. Për Tiranën këto ndeshje do të jenë një test i mirë për të demonstruar se mund të zënë një vend në Europë.