Të premten hidhet shorti i gjysmëfinaleve të Kupës së Shqipërisë

Të premten në orën 11:00, në ambientet e stadiumit “Air Albania” (në sallën e konferencave për shtyp) do të hidhet shorti për fazën gjysmëfinale të Kupës së Shqipërisë për edicionin 2020.

Ekipet gjysmëfinaliste janë: Kukësi, Tirana, Teuta dhe Bylis. Nga shorti do të përcaktohen dy çiftet dhe datat e përballjeve, ndërsa finalja e Kupës së Shqipërisë do të luhet më datën 2 gusht.

Trofeu i Kupës, përveçse prestigjioz dhe me përfitim financiar, është gjithashtu një derë e hapur për të luajtur në Europa League sezonin e ardhshëm.

Sigurisht që për Tiranën dhe Kukësin Europa arrihet nëpërmjet kampionatit, por nuk mund të thuhet e njëjta gjë për Bylisin dhe Teutën, që me pozicionet aktuale në kampionat pa Kupën nuk mund të marrin pjesë në Europa League.