Tirana fiton derbin pas 6 vitesh, mund në “frymën e fundit” Partizanin (VIDEO)

Tirana më në fund arrin që të fitojë një ndeshje ndaj Partizanit. Pas 6 vitesh, skuadra bardheblu ka arritur që të triumfojë në derbin ndaj të kuqve. Në një atmosferë fantastike në stadiumin “Air Albania”, skuadra e drejtuar nga trajneri i përkohshëm, Emmanuele Egbo, ka arritur që të bëjë atë që shumë paraardhës të tij nuk kanë mundur që ta bëjnë për shumë ndeshje.

Goli i bardhebluve do të vinte shpejt, pasi në minutën e shtatë ishte një ish i Partizanit, Idriz Batha, që pas një krosimi të marrë nga krahu, nuk gaboi me kokë, duke dërguar topin në rrjetën e portës së mbrojtur nga Alban Hoxha. Reagimi i Partizanit ishte i menjëhershëm dhe vetëm tre minuta më vonë ishte Jurgen Bardhi që shënoi golin e barazimit, ndonëse mes dyshimeve për një pozicion jashtë loje të Romeros, gjatë aksionit që prodhoi edhe rastin e golit.

Goli i fitores për Tiranën do të vinte pikërisht në sekondat e para të shtesës prej 4 minutash të akorduara nga arbitrat e takimit, ku pas një kundërsulmi të shpejtë, Cobbinah shërbeu për Muçin, që gjuajti menjëherë nga distanca, por gjuajtja e tij u grushtua nga Hoxha, ndërsa topi i mbetur mbi vijën fatale u shty në rrjetë pikërisht nga sulmuesi ganez.

Festë e madhe në kampin bardheblu, ndërsa Cobbinah heq fanellën, duke marrë edhe kartonin e dytë të verdhë dhe lënë Tiranën me 10 futbollistë, por që në këtë rast ja vlen.