ZYRTARE/ Diego Godin është futbollisti më i ri i Interit (VIDEO)

Sporti E Hënë, 27 Shtator 2021 12:51

Interi ka zyrtarizuar goditjen e parë në merkaton e kësaj vere, duke njoftuar afrimin e Diego Godin. Ish mbrojtësi i Atleticos së Madridit, refuzoi rinovimin me Atleticon dhe prej kohësh kishte arritur një marrëveshje me zikaltërit, por vetëm ditën e sotme është bërë edhe njoftimi nga klubi.

Në moshën 33-vjeçare, Godin është një futbollist që i bashkohet Interit me parametra zero dhe pritet të sjellë një eksperiencë të madhe ndërkombëtare, të fituar gjatë 9 viteve të qëndrimit në Madrid, por edhe te kombëtarja uruguaiane. Mësohet se Diego Godin ka nënshkruar një kontratë 3-vjeçare me klubin zikaltër dhe do të vihet në dispozicion të Antonio Contes në ditët e fundit të korrikut, për të formuar një “digë” mbrojtëse bashkë me Milan Skriniar dhe Stefan De Vrij.

Gjatë ditës së sotme zikaltrit pritet të zyrtarizojnë edhe mesfushorin anësor Valentin Lazaro, i cili u ble përreth 22 milionë euro nga Hertha e Berlinit dhe mbërriti mbrëmjen e djeshme në Milano. Këtë javë do të prezantohet me fanellën zikaltër edhe mesfushori i Sassuolos, Stefano Sensi, pasi palët kanë arritur marrëveshjen e transferimit, ndërsa nuk përjashtohen emra të tjerë, pasi po punohet në pista si Edin Dzeko, Romelu Lukaku dhe Nicolo Barrela.