Sistemi aktual i emergjencës së rezervave të naftës në Shqipëri i është ngarkuar industrisë së naftës e cila duhet të ketë të ndarë sasi të nevojshme konsumi mesatar të paktën 90 ditë. Por si funksionon sot menaxhimi i rezervave të naftës dhe kush është përgjegjës për kontrollin e tyre?
“Legjislacioni ekzistues është Inspektoriati Qendror Teknik ai që ka përgjegjësinë për të verifikuar që kompanitë të përmbushin këtë detyrim. Nga diskutimi publik që pamë sot, do të ngrihet bordi i administrimit të rezervave që do të bëjë verifikimin në terren për përmbushjen e detyrimit ligjor”, thotë eksperti për hidrokarburet Dael Dervishi.
Institucioni që ruan konkurrencën e ndershme në treg dhe mbron konsumatorët nga rritjet drastike të çmimeve si ajo me naftën është Autoriteti i Konkurrencës. Ky i fundit ka bërë të ditur se nuk mund të ndërhyjë tek çmimet por vetëm të monitorojë tregun dhe të jetë transparent.
Ish-drejtoresha e Autoritetit të Konkurrencës, Lindita Lati thotë se tregu ende ka shumë probleme, por për të autoritetet mund të veprojnë për të verifikuar kostot e shtuara përtej çmimit real si ndodh me produktet ushqimore, njëjtë dhe me naftën që hyn në vend.
