Inspektimi i kushteve higjieno-sanitare dhe sigurisë së hoteleve në Pogradec

Në Pogradec vijon puna për mbarëvajtjen e sezonit turistik, me fokus te siguria, shërbimet, kontrollet higjieno-sanitare dhe monitorimi i vijës liqenore. Në një postim të bashkisë Pogradec bëhet e ditur se strukturat vendore të shëndetësisë vijojnë monitorimin e cilësisë së ujit të pijshëm dhe të ujërave të liqenit. Sipas përfaqësueses së Njësisë Vendore të Kujdesit Shëndetësor, uji i pijshëm kontrollohet në 12 pika kryesore në njësitë Pogradec dhe Buçimas dhe rezultatet kanë rezultuar brenda parametrave normalë.

“Uji i pijshëm është i konsumueshëm, është shumë i pastër, nuk ka ndotje bakteriale dhe është i klorinuar brenda të gjithë parametrave”, tha ajo. Gjatë shëtitores së Pogradecit janë katër çezma me ujë të pijshëm, të cilat janë monitoruar gjatë gjithë sezonit. Sa i përket ujërave të liqenit, analizat kryhen deri në tri herë në muaj, në pika të ndryshme dhe në distanca 0, 50, 100 dhe 200 metra. Sipas të dhënave të raportuara, ujërat e liqenit janë brenda parametrave të përcaktuar për ujërat sipërfaqësore.

Kontrollet kanë përfshirë edhe sektorin e hotelerisë përgjatë bregut të liqenit. Aktualisht janë kontrolluar 136 subjekte, kryesisht për kushtet higjieno-sanitare dhe certifikatat e dezinfektimit, ndërsa edhe cilësia e ujit të pijshëm në subjektet akomoduese monitorohet veçmas. Në funksion të sigurisë së pushuesve dhe turistëve vijon edhe angazhimi i Policisë Kufitare Pogradec, në kuadër të masave për sezonin turistik. Policia Kufitare ka në dispozicion dy mjete lundruese, një skaf dhe një Jet Ski, të cilat përdoren për këqyrjen dhe kontrollin e mjeteve lundruese.

Në bashkëpunim me bashkinë Pogradec dhe në bashkëpunim me Task-forcën, kontrollet dhe inspektimet kryhen në mënyrë periodike për respektimin e kritereve nga subjektet që administrojnë stacionet private të plazhit, si dhe në plazhet publike. Bashkia Pogradec informon se një rëndësi të veçantë i është kushtuar edhe vendosjes së perimetrit të sigurisë përgjatë gjithë vijës liqenore, si në plazhet private, ashtu edhe në ato publike. Bashkia Pogradec thekson se, krahas fluksit të lartë të muajit gusht, puna në terren vijon për garantimin e një sezoni turistik sa më të sigurt dhe funksional, ndërsa evidentohen edhe nevoja për përmirësime të mëtejshme në sektorin publik dhe atë privat.