Rritet duhanpirja – 10-mujori, hidhen në treg 91 ton cigare më shumë se viti 2016

Importi  i cigareve vazhdon të dominojë tregun shqiptar, edhe pse sasia e prodhimit vendas të këtij produkti është rritur gjatë viteve të fundit. Sipas statistikave zyrtare nga Drejtoria e Përgjithshme e Doganave, për periudhën 10 mujore sasia e duhanit e importuar dhe hedhur në treg për konsum rezulton të jetë 91 ton më shumë se e njëjta periudhë e një viti më parë.

Por referuar të dhënave nga doganat këto shifra rezultojnë vetëm për cigaret dhe jo për gjithë produktin e duhanit. Kështu sipas të dhënave nga doganat,  gjatë kësaj periudhë janë importuar 2491 ton cigare, ndërkohë që për të njëjtën periudhë të një viti më parë  niveli i importit të këtij produkti ishte 2400 ton.

Megjithëse është rritur importi, nuk ka një analizë apo një përcaktim të saktë  se sa është sasia e konsumuar, pasi nuk ka një vlerësim apo matje të  këtij produkti se sa është prodhim vendas.  Megjithëse çdo vit thuajse është rritur  taksa e akcizës për këtë produkt, përsëri niveli i konsumit mbetet i lartë, çka justifikon dhe  sasinë e lartë të importit.

Kështu edhe në paketën fiskale që u miratua pak ditë më parë qeveria rriti akcizën, kjo sipas programimit që kjo vlerë të përafrohet me ato të vendeve të BE.