Zv/ministri i Bujqësisë: Përfitimi i fermerëve nga skema e subvencioneve

Zëvendësministri i Bujqësisë Ilir Halilaj, i ftuar në emisionin “7 pa 5” në Vizion Plus, ka shpjeguar se si do të funksionojë skema e subvencioneve për fermerët dhe cilët mund të përfitojnë.

“Subvencionojmë mbjelljet e reja, sipërfaqet me sera me teknika të avancuara, produktet me origjinë shtazore me kriterin e vetëm për të plotësuar standardet dhe subvencionojmë agroturizmin. Kjo është ndarja e 20 milionë euroshit që kemi në dispozicion. Fermerët duhet të aplikojnë pa asnjë dokument, vetëm me vetëdeklarim. Pasi është kthyer përgjigja e aplikimit, AZHBR bën filtrimin e informacioneve që fermerët kanë dhënë. Në varësi të linjave të çdo komponenti të skemës, bëhet edhe përzgjedhja e fituesve në bazë të kritereve. Kulturat më të favorizuara janë pemët frutore, mollët me varietet të caktuar që kërkohet nga tregu, qershinë, agrumet, ullinjtë, shega, vreshtarit etj”, është shprehur Halilaj.