SHBA-Kubë rivendosin zyrtarisht marrëdhëniet, tashmë me ambasada

Kuba dhe Shtetet e Bashkuara kanë ripërtërirë zyrtarisht marrëdhëniet diplomatike, duke lënë pas dekada të tëra armiqësish.

Vetëm pak pas mesnate, me orën lokale, misionet diplomatike të dy vendeve u kthyen tërësisht në ambasada. 

Sekretari i Shtetit, John Kerry pritet të zhvillojë bisedime me homologun Bruno Rodriguez më vonë gjatë ditës në Uashington. 

Pavarësisht ndryshimit historik, të dyja palët janë të vetëdijshme se kanë pengesa për të kaluar. “Ka ende çështje të cilat nuk i shohim nga i njëjti këndvështrim”, ka deklaruar një zëdhënës i Departamentit të Shtetit. 

Kufizimet për amerikanët që dëshirojnë të vizitojnë Kubën mbeten në fuqi, sikurse embargoja që u ndalon kompanive amerikane të bëjnë biznes në Kubë. 

Nga ana e saj, Kuba deklaron se embargoja, të cilin e quan një bllokadë, është tejet i dëmshëmb për ekonominë e saj. 

Presidenti Raul Castro i ka kërkuar presidentit Barack Obama që ta heqë atë, duke e cilësuar si pengesën më të vështirë drejt normalizimit të marrëdhënieve. 

Por çështja duhet të kalojë më parë për t’u votuar në Kongres. Dy presidentët njoftuan avancimin e lidhjeve diplomatike mes dy vendeve në dhjetor të vitit të kaluar.