Ish-drejtori i Përgjithshëm i Agjencisë së Trajtimit të Kredive, Eri Koshaj ka kallëzuar në polici bashkëshortin e ministres Delina Ibrahimaj, duke thënë se e ka qëlluar me thikë për shkak të detyrës.
Ngjarja ka ndodhur në 20 nëntor 2023, ku Koshaj thotë se ka qenë mëngjes kur po ecte në rrugën “Tefta Tashko Koço”, dhe prej një lokali ka dalë Andi Ibrahimi, burri i ministres, i cili i ka kërkuar të sqaroheshin në një ambient aty pranë.
Koshaj nuk ka pranuar dhe më pas Ibrahimaj, sipas kallëzimit të Drejtorit në Polici, e ka ofenduar dhe e ka goditur me thikë. Ai deklaron më tej se ngjarja lidhet me pozicionin e tij të punës, pasi Andi Ibrahimaj ka menduar se drejtori nuk i ka rinovuar kontratën e punës një mikut të tij.
Policia e ka referuar kallëzimin në prokurori për goditje për shkak të detyrës. Mësohet se autori nuk është kapur në momentin kur është bërë kallëzimi dhe prokurori ka kërkuar të ndiqet në gjendje të lirë.
Lidhur me këtë rast ka reaguar sot edhe Policia e Shtetit, e cila ka bërë të ditur se “Më datë 21.11.2023 i është marrë kallëzimi shtetasit E. K. se, në rrugën “Tefta Tashko Koço” është kanosur dhe goditur për shkak të detyrës nga shtetasi A. I. Shtetasit E. K. i është dhënë vendim mjeko-ligjor. Në vijim të veprimeve dhe në zbatim të detyrave të lëna nga prokurori i procedimit penal i është marrë deklarim shtetasve A. I., E. M. e O. M. dhe materialet janë referuar në prokurori më datë 04.12.2023 për veprën penale “Goditjet për shkak të detyrës”, në ngarkim të shtetasit A. I”. /Top Channel/
