Gjykata e Posaçme kundër Korrupsionit dhe Krimit të Organizuar ka vendosur masën ”arrest në burg” për biznesmenin Ergys Agasi, i cili akuzohet në kuadër të dosjes së AKSHI-t. Agasi u paraqit këtë të premte në GJKKO, pasi u arrestua pas rreth tetë muajsh në arrati. Ai u transportua nga Blloku i Sigurisë drejt gjykatës me një furgon policie.
”Nuk kam qenë asnjëherë pjesëmarrës në tenderë, nuk kam pasur asnjë përfitim financiar nëpërmjet tenderimit dhe aq më pak të kem qenë pjesë e grupeve kriminale”. Këto janë deklarimet që dha para togave të zeza Ergys Agasi, dhe dëshminë e tij e zbardhi avokati i tij mbrojtës, Maks Haxhia në përfundim të senacës që zgjati më shumë se 4 orë. Avokati tha se do të ankimojnë akuzën e korrupsionit pasiv që është shtuar ndaj Agasit.
”Sot erdhi me një akuzë të re, korrupsion pasiv. Pasiguria e materialit të paraqitur deri më tani e ka ndjekur SPAK deri më sot dhe kështu për të qëndruar në pozitat e presionit ndaj gjykatës dhe për ti thënë opinionit që jemi këtu, sot u paraqit kjo akuzë. Prokuroria nuk solli asnjë moment, asnjë pasazh filmimi nga këto. Të takosh një njeri që nuk është kriminel, nuk është vepër penale mesa di unë. Ne po kërkojmë provat e prokurorisë, ku qëndron korrupsioni”, tha Haxhia.
Biznesmeni Agasi u lokalizua dhe u arrestua mbrëmjen e së mërkurës në zonën e Plepave në Durrës, pas një ndjekjeje që kishte nisur në Elbasan. Gjatë operacionit, policia rrethoi automjetin Audi RS6, me vlerë rreth 100 mijë euro, me të cilin udhëtonte Agasi. Në makinë u gjetën edhe rreth 4 mijë euro cash.
Në momentin e arrestimit, Agasi shoqërohej nga ish-zyrtari i lartë i Policisë së Elbasanit, Ulian Shpataraku, i cili ndodhej në rolin e shoferit. Edhe Shpataraku ishte shpallur në kërkim nga autoritetet. Shpataraku u arrestua në flagrancë për përkrahje të autorit të krimit. Ai dyshohet se disa javë më parë kishte kërcënuar me jetë punonjës të një hoteli në jug të vendit.