Trepikëshi i marrë në sfidën me Dinamon e bën Tiranën të mbajë të sigurtë të paktën edhe për një javë vendin e parë, ndërsa kjo ishte fitorja e katërt radhazi.
“Patjetër që jam i kënaqur. Është një fitore ndaj një rivali dhe skuadre shumë të mirë. Meritat shtohen akoma më shumë sepse skuadra luajti për disa minuta me një lojtar më pak. Ekipi ndërkohë meriton përgëzime për sakrificën dhe shpirtin e garës që tregoi”, tha Orges Shehi, trajneri i Tiranës.
Kurse presidenti i Tiranës, Refik Halili theksoi faktin se kampionati është shumë i gjatë dhe se janë shumë ndeshje në lojë, shumë pikë.
“Do të shikoj skuadrën time, por ne e dimë që ka shumë ekipe që pretendojnë për titull. Janë 7 skuadra dhe është shumë shpejt për të folur për titullin. Kuptohet që unë kam dëshirë që ne të ecim përpara dhe të shkojmë drejt rrugës që kemi nisur”.
