Belind Këlliçi, kandidati i koalicionit “Bashkë Fitojmë” për Tiranën, në javën e fundit të fushatës elektorale u ndal te rruga e Barrikadave me qytetarët. I shoqëruar nga disa prej kandidatëve për këshill bashkiak, si Ilir Alimehmeti dhe Tedi Blushi, kandidati Këlliçi akuzoi kryebashkiakun e Tiranës, Erion Veliajn se ka shpërdoruar taksat e qytetarëve me buxhetin që ka përdorur për të rindërtuar gjimnazin “Sami Frashëri”.
“Nuk ka pse të bëhet 700 mijë euro fasada e një shkolle, ndërsa në Yrshek dhe në Katund të Ri nuk ka shkollë, në Vishnje nuk ka shkollë. Nxënësit nuk kanë nevojë për fasada”, tha Këlliçi. Pak më tutje, u përshëndet me disa nxënës të një shkolle 9-vjeçare, të cilët duket se e habitën me njohuritë mbi premtimet e tij për menaxhimin e Tiranës.
Bllokimi i hapësirave publike duke nisur nga trotuaret ishte një tjetër problematikë që Këlliçi pohoi se duhet të marrë zgjidhje. I bindur për fitoren, Këlliçi theksoi se edhe kryeqytetasit e ndjejnë ndryshimin që sipas tij do të vijë me të në krye të Tiranës.
