Fushata për zgjedhjet lokale të 14 majit nisi dje zyrtarisht dhe kampet janë në terren për të bërë premtimet dhe për të bindur qytetarët që të votojnë. Por a mund të bëhen premtime, për të ndërtuar shkolla, kopështe e spitale, nëse kandidati për kryebashkiak nuk ka njohuri për numrin e popullsisë që voton në këto zona? Rasti në fjalë vjen nga Kukësi, ku kandidati për kryetar bashkie, Admir Sinamati ka qenë i ftuar në televizionin ALBUK, ku ka folur për problematikat e qytetit. Kryefjala është shpopullimi dhe largimi masiv i të rinjve drejt Mbretërisë së Bashkuar. Në diskutimin me gazetarin Ardi Omeri, ai u pyet disa herë për numrin e banorëve të Kukësit, por nuk dha dot një përgjigje ekzakte.
Diskutimi mes tyre:
Admir Sinamati: Shqipëria konkurron në vendet në konflikt për…
Gazetari: Nuk e pranoj unë këtë që thua
Admir Sinamati: Janë statistika, largimet nisin në 2015. Unë e gjeta në një revistë ndërkombëtare
Gazetari: Sa banorë ka Kukësi?
Admir Sinamati: Në lista ka 46 mijë, po fizikisht janë gjysma. Po themi 20-25 mijë
Gazetari: Pra ju, një administrator qyteti është si baba shtëpie, nëse ai nuk di sa banorë ka nuk ka pse rri kot në këtë vend. Nëse pyesim në Durrës etj, dhe nuk e di, ai nuk është administrator. As kryeministri, as kryetari nuk i dinë.
Në fakt, Dosja kërkoi dhe “Porta Vendore”, një portal i specializuar për njësitë e qeverisjes vendore jep këto të dhëna për popullsinë e Kukësit. Sipas Censusit të vitit 2011, popullsia është 47,985 banorë. Ndërkohë që sipas Regjistrit Civil, kjo bashki ka 59,393 banorë. Bashkia e re ka një sipërfaqe prej 933.86 km2 me një densitet prej 63.59 banorë/km2 sipas Regjistrit Civil dhe 51.38 banorë/km2 sipas Censusit 2011.
