”Foltorja” po bëhet gati përgatitjet e fundit për mbledhjen e Kuvendit Kombëtar të 11 dhjetorit. Ish-deputeti Gent Strazimiri thotë se tashmë pothuajse gjithçka është gati dhe po merren me organizimin e detajeve të vogla. Ai ka edhe një përgjigje për Gazment Bardhin dhe Bashën, duke thënë se përpjekja e tyre për të errësuar transparencën në lidhje me firmat ka dështuar.
”Nga pikëpamja organizative ky kuvend nuk ndryshon nga Kuvendet e tjera. Jemi në fazën e organizimit të detajeve të vogla të ditës së Kuvendit, pjesëmarrjen e delegatëve, sistemimin e tyre në sallë, mënyrën se si do të identifikohen.
Shqetësimi i të dhënave personale, i ID, sigurisht që nuk mund të liheshin në dorën e personave që janë kundër mbledhjes së Kuvendit. Ajo që po ndodh sot është se po verifikohen emra dhe mbiemrat e delegatëve dhe jo numrat personal në kartë. Besoj se kjo është mjaftueshme. Nëse ka persona që i është përdorur emri, ose siç pretendon tashmë ish-kryetari që i është marrë firma, jashtë vullnetit të tij, mund të dalë dhe mund të thotë të vërtetën.
Bardhi fillimisht tha që njerëzit nuk ekzistojnë, fillimisht thanë që përkrahja e kryetarit është 97% dhe vetëm 3% janë kundër, pastaj thanë që firmat janë por nuk janë sjellë në mënyrë korrekte. Tashmë që është 70% e firmave dhe vazhdon mbledhja e tyre, do të jenë më shumë se ata që kanë firmosur. Unë e parashikoj diku te 80%. Çdo fjalë që thotë Bardhi dhe çdo përpjekje për të errësuar transparencën është një përpjekje e dështuar”,-tha në ”Ora News”.
