Pyetje nga Xh.B në rubrikën e “Koha Jonë”, “Pyetje Psikologut“
-Pse burrat tradhtojnë nga mosha 40-50 vjeç?
Përgjigjja e Psikologes, Jonida Ucaj Ponari, Msc në Psikologji Klinike, Ma në Këshillim Psikologjik.
Jonida Ucaj Ponari
Përshëndetje z. Xh.B,
Faleminderit për pyetjet drejtuar rubrikës “Pyetje për Psikologun” në gazetën “Koha Jonë”.
Ju pyesni “Pse burrat tradhtojnë nga mosha 40-50 vjeç?”
Kjo dekadë përkon me ndryshime të sjelljes në jetën e mashkullit, vitet kalojnë dhe pamja e jashtme ndryshon, rrudhat fillojnë dhe bëhen më të dukshme, thinjat po ashtu. Pak më tepër bark dhe në mendjen e mashkullit fillon të krijohet një imazh i ri i vetes. Ai gjendet para faktit që nuk është më 25 vjeç! Në këtë moshë mashkulli është i ekspozuar ndaj krizës së moshës së mesme, ku vazhdimisht kërkon të rikonfirmojë mashkulloritetin e tij.
Gjendur në këto kushte, tradhtia shikohet si rikonfirmim i aftësisë seksuale. Ai do të “mbajë gjallë” ndjenjat e vlefshmërisë së vetes si figurë mashkullore. Ai mund ta konsiderojë këtë periudhë si një “rebelim adoleshent”, ku mashkulli mendon mënyra si po jeton nuk është ajo që meriton. Ai mendon se i duhet diçka të re, një mënyrë për të dalë nga skema dhe orientohet drejt tradhtisë.
Gjatë kësaj periudhe meshkujt kanë edhe frikën e vdekjes. Mënyra si tentojnë që të luftojnë këtë situatë është duke tradhëtuar. Kështu ato e përdorin tradhëtinë si një mekanizëm për t’i vërtetuar vetes që janë gjallë, që aftësia mashkullore e tyre është e paluhatshme. Madje, jo pak herë dëgjojmë tradhëtira ku mashkulli është 50 vjeç dhe zgjedh partnere që mund të ishte në moshën e vajzës së tij. Duke bërë këtë zgjedhje ai dëshiron të ndjehet ende i ri. Tradhëtia mashkullit i jep një stimul që të ndërmarrë një rrezik, kjo i rrit adrenalinën, pra e bën të ndjehet gjithmonë aktiv.
Pra, për sa më lart meshkujt presupozohet se tradhëtojnë në këtë periudhë për shkak të refuzimit për të pranuar ndryshimet që përkojnë me moshën e sipërcituar, krizës së moshës së mesme, për rikonfirm të aftësisë seksuale, dhe nga frika e vdekjes.
Nuk ua plotëson nevojat gruaja apo është tipar mashkullor tradhtia?
Përpara se të konkludohet se tradhtia është tipar mashkullor, duhet vëzhguar fenomeni “tradhti mashkullore” nga shumë faktorë influencues. Sigurisht që mendohet që meshkujt të jenë më të predispozuar për tradhtinë, por kriza e moshës së mesme duket se ndikon në rritjen e tradhtive.
Po ashtu, edhe mosplotësimi i nevojave shumëdimensionale mashkullore përkon me tradhtinë. Këtu nuk i referohem vetëm nevojave seksuale, por nëse analizojmë pak më në detaj duhet të përpiqemi të kuptojmë nëse: A është thellësisht i lumtur ky mashkull? A ka qënë bashkëshortja/partnerja aty për të, duke e mbështetur në rrugëtimin e përbashkët? A ka mungesa partneri nga marrëdhënia aktuale, apo çështje të mbartura e konflikte të pazgjidhura nga e kaluara?
Përpos argumentimit të sipërcituar, që sigurisht ndikojnë në tundimin për tradhëti ndaj partneres, në bindjen time personale, faktorët e sipërcituar nuk legjitimojnë aktin e tradhtisë.
Si konkluzion, për arsye se meshkujt e kryejnë aktin e tradhtisë respektivisht me femra, që nga ana e tyre (jo gjithmonë) mund të jenë duke tradhtuar dikë, rezulton se tradhtia nuk është tipar vetëm mashkullor. Më problematike e me nevojë emergjente për të adresuar impulsin seksual, shikoj tradhtarin serik. Eksitimi për një përvojë të re seksuale, i motivon si stimul drejt tradhtisë. Sapo të ketë shlyer kuriozitetin, mendja e tij orvatet për diçka të re. Më tej, nëse tek këta individë përkon dhe fakti ndikues që janë figura publike, apo kanë një status të veçantë në shoqëri, dhe rrjedhimisht kjo s’do i sillte refuzim nga “gjahu” që ato tentojnë, fenomenin e shoh me një shtrirje problematike edhe më të thellë. Z. Xh.B pyetjeve tuaja të tjera mbi qasjen femërore të fenomenit tradhti do i analizojmë në publikimin e radhës.