Kryeministri: Arkitektët më të shquar të botës në Tiranë. Zhvillimi duhet të jetë në harmoni me natyrën

Kryeministri Edi Rama ishte i pranishëm në “Bread & Heart” Festival, një ngjarje e re europiane, që bashkon në Tiranë, për të dytin vit radhazi, arkitektë të mirënjohur ndërkombëtarë nga Europa, Azia, Amerika e Veriut dhe Amerika e Jugut.

“Ndërkohë që merresha me gjëra të tjera, u kërkova bashkëpunëtorëve të më përgatisnin një fjalë, por ajo ishte shumë e gjatë. Ju e dini vlerësimin e madh që kam për arkitektët, të cilëve u është dhënë një bekim nga Zoti, sepse të gjithë kanë nevojë për ta. Nuk do të ishim dot këtu nëse pas kësaj që shohim nuk do të ishte një arkitekt. Nuk do të jetonim në një qytet nëse nuk do të kishte arkitektë.

Kjo është një arsye shumë e fortë për t’i besuar arkitekturës si diçka që shkon përtej pranisë fizike. Donim të sfidonim veten dhe të gjithë ju duke zgjedhur një temë që, për fat të keq, përdoret gjithmonë për të vënë përballë arkitektët dhe zhvilluesit me magjinë e kurajës dhe imagjinatës për të ndërtuar realitete të ndryshme.

Kjo na sfidon ne dhe ju që të ndihmojmë për të kuptuar më mirë kufijtë tanë dhe tuaj. Ruajtja e natyrës duhet të ketë të bëjë edhe me zhvillimin në harmoni me natyrën; jo për ta vendosur natyrën në shërbim të njerëzve, por edhe anasjelltas.

Më kujtohet diçka e thënë nga një njeri shumë i çuditshëm, i cili nisi si biznesmen në Francë dhe më pas u vendos në Amerikën Latine, sepse ishte i fiksuar pas shërimit të komuniteteve. Ai thoshte se termi “i qëndrueshëm” nuk është aspak korrekt në raport me brezat e ardhshëm. Ajo që është korrekte në raport me ta është marrëdhënia me natyrën.

Këtu kemi arkitektë që vijnë nga të gjitha anët e botës: nga Europa, Kina, SHBA-ja dhe Amerika Latine.

Është një nder për mua që kam këtu pranë dikë që as në ëndrrat e mia më të bukura nuk e mendoja se do të vinte këtu për të nderuar diçka që po bëja së bashku me arkitektë të tjerë, Santiago Calatrava. Ju falënderoj shumë që i keni besuar këtij projekti, që jeni këtu, dhe e di se në fillim erdhët sepse ishit kureshtarë të më shihnit mua, por tani nuk ju duhem më, sepse ktheheni për Shqipërinë.

Gjatë gjithë jetës sime kam marrë shumë sulme dhe disa komplimente. Është një ndjesi e madhe të shohësh njerëz që hyjnë përsëri në shtëpitë e tyre pasi ua shkatërroi tërmeti; kjo të bën t’i zhvlerësosh sulmet.

Dua të ndaj me ju komplimentin më të madh që kam marrë nga një udhëheqës i madh i një vendi shumë të pasur jashtë Europës, gjithashtu i apasionuar pas arkitekturës, por me shumë më tepër mundësi financiare për t’i realizuar gjërat.

I dërgova fotografi nga festivali i parë dhe nga punët tuaja. Ai zakonisht përgjigjet me emoji dhe nuk flet shumë. Më shkroi: “Uau, Albania! Një ditë dua të ulemi së bashku dhe të më tregosh si e bën gjithë këtë pa para.” Ishte mesazhi më i gjatë që kam marrë prej tij”, tha Rama.