Supermodelja Bella Hadid, një lidhje e re pas Adan Banuelos

Supermodelja Bella Hadid nuk ka qëndruar gjatë beqare pas ndarjes përfundimtare nga Adan Banuelos. Pavarësisht thashethemeve për një rikthim me kaubojin, Hadid duket se ka kthyer faqen me menaxherin e projekteve Nathan Lacy. Zërat për një flirt të mundshëm të 29-vjeçares nisën në shkurt, kur ajo u fotografua në Milano në shoqërinë e një burri misterioz. Vetëm së fundmi, pas një tjetër daljeje publike të çiftit, u zbulua identiteti i tij.

Burri në krah të Hadid është Nathan Lacy, 38 vjeç, trashëgimtar i një familjeje të pasur nga Kolorado, e cila zotëron një firmë ndërtimi në Crested Butte. Familja e Lacy-t është e njohur në të gjithë shtetin si “shumë katolike dhe shumë konservatore”. Pas shfaqjes së parë në Milano, çifti është fotografuar disa herë ditët e fundit në qytetin e lindjes së Lacy-t, një vendbanim me më pak se 2 mijë banorë në qarkun Gunnison.

Megjithatë, sipas burimeve të informuara, është ende herët për të folur për një histori dashurie serioze. Një burim i tha Daily Mail se “është thjesht dikush me të cilin ajo po del, një person që po njeh”. I njëjti burim shtoi se “mos u entuziasmoni shumë”, duke theksuar se Bella dëshiron vetëm të argëtohet dhe të mos mendojë për të ardhmen. Ajo nuk po kërkon të martohet apo ta shndërrojë këtë lidhje në diçka më shumë se sa është aktualisht.

Një burim tjetër theksoi se Bella ende nuk është rikuperuar plotësisht nga fundi i marrëdhënies së saj me Adan Banuelos, e cila filloi në vitin 2023 pas zhvendosjes së supermodeles në Teksas. “Historia me Adanin e ka provuar shumë, ajo e donte vërtet dhe ai e donte atë, por nuk funksionoi. Ajo mbeti e lënduar dhe iu desh kohë për të kapërcyer dhimbjen,” tha burimi. Hadid kishte deklaruar më parë se nuk do të fillonte një tjetër lidhje për të paktën një vit, pikërisht për të shmangur përjetimin e sërishëm të asaj vuajtjeje.

Marrë nga La Gazzetta dello Sport