Vedat Muriqi është idhulli më i ri i tifozëve të Mallorcas. Në një vit e gjysmë te Lazio kishte shënuar vetëm 2 gola në 49 ndeshje, duke u cilësuar si një nga blerjet më të dështuara të klubit.
Në ditën e fundit të merkatos së janarit Lazio e largoi në formë huazimi Muriqin te Mallorca deri në fund të sezonit për një pagesë prej 1 milion eurosh, duke shpresuar që e drejta e blerjes të aplikohet nga spanjollët. Nëse një gjë e tillë do të ndodhë, atëherë duhet të shtojnë dhe 9 milionë euro të tjera.
Me të në fushë Mallorca ka arritur dy fitore në dy ndeshje që është aktivizuar. Një gol, një asist dhe pjesëmarrjen vendimtare në aksionin e golit të suksesit në ndeshjen e fundit të luajtur nga skuadra e Luis Garcias janë mëse të mjaftueshme për të hyrë në zemrat e tifozëve.
