Ndihmës sekretari Amerikan për çështjet europiane dhe euroaziatike, Philip T. Reeker, në vizitën një ditore në Tiranë, ndonëse nuk foli për mediat, shkaktoi ”furtunë” në politikë. Reeker u takua edhe me kreun e PD-së, Lulzim Basha dhe deputeti i zgjedhur më 25 prill, Ervin Salianji, thotë për ”Euronews Albania” se partneriteti me SHBA është prioritet absolut për PD-në.
I pyetur për takimin Reeker-Basha, ai u shprehur se qëllimi i vizitës është lufta kundër korrupsionit. ”Qëndrimi i PD, është një qëndrim i qartë. Partneriteti strategjik me SHBA dhe thellimi i këtij partneriteti është prioritet absolut i PD dhe takimi i djeshëm pa diskutim që të tregon dhe vëmendjen e SHBA ndaj PD dhe si një nga partnerët më të besueshëm të SHBA”, deklaroi deputeti i zgjedhur i PD.
Po ashtu ai thekson se PD-ja ka mbajtur qëndrim parimor lidhur me shpalljen “non grata” të ish-kryeministrit Sali Berisha. ”Siç edhe kemi dëgjuar nga qëndrimi publik i ambasadores ka pasur të dhëna konkrete të çuar në prokurori për rastet në fjalë. Të njëjtin standard kemi kërkuar ashtu siç ka kërkuar edhe vete ish-kryeministri, ka kërkuar prova, ashtu siç me të drejtë një parti politike që përfaqëson gati gjysmën e shqiptarëve, ka kërkuar prova”.
