Katër të vrarë në dy orë, Salianji: Tregojnë degradimin e rendit dhe sigurisë

Ish-deputeti demokrat, Ervin Salinji, reagon pas ngjarjeve të rënda kriminale që tronditën këtë pasdite Lezhën dhe Durrësin, por edhe mbarë opinionin publik, ku në dy orë u ekzekutuan katër persona.

Salianji shkruan në “Facebook” se këto vrasje tregojnë qartë degradimin e rendit dhe sigurisë publike, duke shtuar se “keqqeverisja dhe tallja me show po merr jetë njerëzish, po falimenton biznese dhe po shkakton trauma për qytetarët”.

Mesazhi i plotë:

Katër të vrarë, dy në Lezhë, dy në Durrës në mes të rrugës tregojnë qartë degradimin e rendit dhe sigurisë publike, qesharakëzimin e postblloqeve me polici dhe me ushtri me mitraloza apo policë me syze dhe policë me armë nëpër godina bosh që qeveria i nxjerr për të bërë foto propagande.

Për fat të keq çdo ditë e më shumë keqqeverisja dhe tallja me show po merr jetë njerëzish, po falimenton biznese dhe po shkakton trauma për qytetarët.

Sot kushdo e kupton që masat e qeverisë janë për të izoluar të varfërit, qytetarët që respektojnë ligjin , bizneset e ndershme, ndërkohë që kriminelët me armë lëvizin lirshëm dhe vrasin ditën për diell.