Bombolat e oksigjenit që shërbejnë për të trajtuar pacientët e sëmurë me Covid-19 dhe sëmundje të tjera të rënda, por edhe të plagosurit e luftës po mbarohen në Ukrainë.
Lajmi është konfirmuar nga Organizata Botërore e Shëndetësisë (OBSH), e cila bëri me dije se kamionët nuk ishin në gjendje të transportonin furnizime nga fabrikat në spitalet brenda vendit, duke përfshirë edhe kryeqytetin Kiev. Kjo do të thotë, sipas OBSH-së, se rezervat mund të mbarojnë brenda 24 orëve.
Organizata tha se po punohet me partnerët ndërkombëtarë për të marrë dërgesa urgjente përmes Polonisë.
“Situata e furnizimit me oksigjen në vend është në një pikë shumë kritike”, deklaroi drejtori i përgjithshëm i OBSH-së, Tedros Adhanom Ghebreyesus dhe drejtori rajonal i OBSH-së për Evropën, Hans Kluge.
OBSH, sqaroi se disa fabrika prodhuese në Ukrainë po përballen me mungesën e zeolitit, një produkt thelbësor, kryesisht i importuar dhe që nevojitet për të prodhuar oksigjen të sigurt mjekësor.
Po ashtu, shërbimi në spitale është tepër i vështirë për t’u dhënë për personat e sëmurë, por edhe për të plagosurit e luftës për shkak të mungesës së energjisë elektrike.
