Challandes: Fitore karakteri, lojtarët ishin gati të vdisnin në fushë

Bernard Challandes është arkitekti i kësaj Kosove dhe ka meritë të veçantë në suksesin e “Dardanëve” ndaj Çekisë. Trajneri u shpreh u shfaq i lumtur pas fitores 2-1 duke vlerësuar lojën e bërë nga futbollistët e tij që dhanë maksimumin në fushën e lojës.

“Ishte karakteri i ekipit. Ne pësuam gol, por ekipi nuk u dorëzua dhe lojtarët ishin të gatshëm të vdisnin në fushë. Ishte një performancë e jashtëzakonshme e skuadrës. Vendi i parë? Nuk dua të flas momentalisht për kreun, do të luftojmë deri në fund. Ne do të luajmë ndaj Anglisë, Malit të Zi, e në fund ndaj Çekisë.

Nuk mund të them se ndeshja ndaj Malit të Zi do të jetë vendimtare, por ne duhet ta fitojmë atë ndeshje. Duhet të mbajmë këmbët në tokë. Është një vazhdimësi shumë e mirë (me 15 ndeshje pa humbje) dhe duhet ta uroj ekipin për këtë ecuri”, deklaroi Challandes pas ndeshjes.