Dalic karikon futbollistët para finales: Ndeshja e jetës, ja çfarë u kam thënë futbollistëve

“Nëse do të fitojmë Kupën e Botës asnjë nuk do të jetë më krenar se ne, pasi jemi nj vend i vogël. Në rast se humbim, do t’i bëjmë komplimenta kundërshtarit”. Kështu është prezantuar trajneri i Kroacisë, Zlatko Dalic në konferencën për shtyp para finales së madhe që do të luhet nesër në orën 17:00 në “Luzhniki Stadium”.

“Si ne ashtu edhe kundërshtarëve nuk na intereson tradita apo statistikat, pasi ata janë për t’u thyer. Do të jetë momenti më i bukur në jetën tonë. Futbollistëve u kam thënë që të luajnë lojën e tyre. Shpresoj që nesër 4 milionë kroat të dalin në rrugë për të festuar, njëlloj si në karnavalet në Brazil apo Argjentinë.

Ajo që më lumturon më shumë është se nëse lojtarët nuk do të jenë në 100% të formës do të ma thonë. E dinë se luhet për titullin kampion bote dhe nëse nuk do të jenë në gjendje të japin maksimumin në fushë do të gabojnë dhe kjo gjë nuk lejohet. Ndaj do të më thonë të vërtetën. Kemi disa lojtarë titullarë me dëmtime të lehta dhe shpresoj që deri të dielën të kenë rikuperuar dhe të jenë 100% gati. Në të kundërt, kam mjaft kampionë edhe në stol, që janë gati për të luajtur dhe për të dhënë maksimumin”, u shpreh Zlatko Dalic.