Deschamps zbulon listën dhe kërkon kujdes: Shqipëria ende në garë!

Pak ditë para dy ndeshjeve kualifikuese për “Euro 2020”, kundër Shqipërisë dhe Andorrës, Didier Deschamps iu përgjigj pyetjeve të gazetarëve në një konferencë shtypi, ku zbuloi edhe listën e futbolllistëve të grumbulluar.

Mbappe dhe Kante nuk do të luajnë ndaj kuqezinjëve dhe Andorrës, pasi nuk janë grumbulluar për shkaqe dëmtimi. Mungesa të tjera të rëndësishme do të jenë edhe ato të Lacazzete e Umtiti të lënë jashtë nga trajneri Deschamps për zgjedhje teknike. Trajneri i kampionëve të botës në fuqi u ndal edhe te Shqipëria, që do të jetë kundërshtari i radhës i “gjelave”.

“Është një kundërshtar, që ne e respektojmë. Me gjashtë pikë, Shqipëria është akoma në garë. Ata kanë një organizim specifik, me tre mbrojtës qendrorë. Është një kundërshtar, ndaj të cilit nuk është e lehtë për të luajtur. Sidomos në shtëpi, është edhe më e vështirë ndaj tyre. Ne do ta përgatisim këtë ndeshje me seriozitet dhe përqendrim maksimal”, deklaroi strategu i Francës.