Icardi gati të rikthehet tek Interi, por i vendos tre kushte klubit

Interi po kalon një moment të vështirë, pasi po përballet me një emergjencë totale në repartin e sulmit. Dje në mbrëmjen e djeshme ka pasur një takim të dytë mes Marottës, Wanda Narës, Icardit dhe avokatit të çiftit, Paolo Nicoletti, i cili po bën edhe ndërmjetësuesin për të rivendosur paqen mes palëve.

Rezultatet nuk kanë qenë aspak optimiste, pasi Icardi ka vendosur kushtet e tij që të rikthehet, duke qenë se ka hequr dorë nga pretendimi për të pasur shiritin e kapitenit, por ka kërkuar të tjera gjëra ndaj shoqërisë.

Kështu kërkesa më e rëndësishme e sulmuesit është që klubi të dalë dhe të japë një sqarim publik për arsyet pse e detyruan t’i heqë shiritin e kapitenit, gjë që Marotta kërkon ta shmangë medoemos, pasi kërkon që problem të mbetet brenda ambienteve familjare.

Kërkesa e dytë e sulmuesit është që Interi të nisë një fushatë për të përmirësuar imazhin e Icardit dhe të bashkëshortes menaxhere të tij, ndaj të cilëve janë thënë shumë fjalë të tepërta gjatë kësaj kohe lufte mes palëve.

Kërkesa e fundit e Icardit është që të vijojë të ketë një rol të rëndësishëm në dhomat e zhveshjes, ndërsa pretendon se ka marrëdhënie të mira me pjesën më të madhe të lojtarëve dhe nuk ka asnjë arsye për të kërkuar ndjesë.