Interi nuk ndalet në merkato, ka gati një super shkëmbim me Romën

Edin Dzeko tek Inter dhe Mauro Icardi te Roma duket gjithnjë e më shumë një shkëmbim i mundshëm. Prej javësh tratativat mes dy klubeve vijojnë dhe falë shitjes së Ivan Perisic te Bayern Munich, mund të bëjë që zikaltërit të shtojnë ofertën për boshnjakun duke e çuar në 18 milionë euro.

Klubi verdhekuq ndërkohë nuk dëshiron që të lirohet nga sulmuesi pa siguruar zëvendësuesin e tij, dhe përderisa nuk po arrihet ende një akord me Higuain, po mendojnë për ish-kapitenin zikaltër.

Mauro Icardi do të ishte një zgjedhje ideale, teksa një ofertë prej 35 milionë eurosh dhe boshnjaku do të bindnin Interin për ta lënë të lirë, duke i kënaqur të dyja klube. Problemi qëndron te sulmuesi argjentinas, i cili nuk është i bindur për këtë transferim, pasi kërkon vetëm një lëvizje te Juventusi. Në ditët në vijim pritet që të mësohet edhe më shumë për fatin e Icardit dhe Dzekos. /R.Lika-Koha Jone/