Ish-bomberi i Partizanit, Ekuban bën namin edhe në “Europa League”

Ish-sulmuesi i Partizanit, Kaleb Ekuban, po shpërthen në futbollin europian. Në një ndeshje vërtetë historike për të dhe ekipin e tij Trabzonspor, sulmuesi ganez shënoi mbrëmjen e djeshme një tripletë në Athinë kundër AEK, në ndeshjen kualifikuese për grupet e Europa League.

Ekuban shënoi në minutën 29-të, 44-të dhe 70-të, pothuajse duke i siguruar ekipit turk një vend në grupet e turneut. Ganezi me pasaportë italiane shpërtheu pikërisht në Tiranë, pas disa vite në seritë më të ulëta italiane, ku në vitin 2016-2017 realizoi plot 17 gola.