Januzaj i zuri vendin në kombëtare për Botërorin, Nainggolan jep dorëheqjen nga Belgjika

Roberto Martinez, trajneri i Belgjikës, ka shpallur sot listën paraprake me 28 futbollistë të cilët do të grumbullojë për Botërorin që nis më 14 qershor në Rusi.

Surpriza e madhe e kësaj liste ishte lënia jashtë e Radia Nainggolan, futbollistit të Romës dhe ftesa për Adnan Januzaj, i cili aktivizohet me Real Sociedad në “La Liga”.

Për këtë vendim trajneri ka deklaruar: “Nainggolan është një lojtar i fortë. Por vendimi është për arsye taktike. Në dy vitet e fundit ekipi ka punuar në një mënyrë specifike dhe janë lojtarë të tjerë që i kanë ato role. Ne e dimë potencialin që ka Januzaj. Ai është një lojtar që mund të ndihmojë shumë ekipin në mënyrën se si ne duam ta ndërtojmë lojën tonë.”

I menjëhershëm ka qenë reagimi i mesfushorit të Romës, i cili me anë të rrjeteve sociale përveçse thumboi trajnerin ka surprizuar me vendimin për t’u tërhequr nga kombëtarja.

“Me shumë dhimbje në zemër unë i dhashë fund karrierës ndërkombëtare… Gjithmonë kam bërë gjithçka për të qenë atje dhe përfaqësoj Belgjikën… për fat të keq vërtet që nuk jam i mirë për disa … Dhe nga sot unë do të jem një tifozë më shumë”, shkruan Nainggolan në Instagram.

Lista e plotë e Belgjikës

Portierë: Koen Casteels (Wolfsburg), Thibaut Courtois (Chelsea), Simon Mignolet (Liverpool), Matz Sels (Newcastle)

Mbrojtës: Toby Alderweireld (Tottenham), Dedryck Boyata (Celtic), Laurent Ciman (Los Angeles FC), Christian Kabasele (Watford), Vincent Kompany (Manchester City), Jordan Lukaku (Lazio), Thomas Meunier (Paris Saint-Germain), Thomas Vermaelen (Barcelona), Jan Vertonghen (Tottenham);

Mesfushorë: Nacer Chadli (West Brom), Kevin De Bruyne (Manchester City), Mousa Dembele (Tottenham), Leander Dendoncker (Anderlecht), Marouane Fellaini (Manchester United), Youri Tielemans (Monaco), Axel Witsel (Tianjin Quanjian);

Sulmues: Michy Batshuayi (Chelsea), Christian Benteke (Crystal Palace), Yannick Carrasco (Dalian Yifang), Eden Hazard (Chelsea), Thorgan Hazard (Borussia Monchengladbach), Adnan Januzaj (Real Sociedad), Romelu Lukaku (Manchester United), Dries Mertens (Napoli).