Klubi i Seria A bën ofertë për sulmuesin e kombëtares sonë

Sokol Cikalleshi mund të luajë në Seria A në sezonin e ri. Për bomberin shqiptar, i cili është në pronësi të klubit turk Akhisarspor, interesohet Lecce që është në kërkim të një sulmuesi me eksperiencë për të shpresuar te mbijetesa në Serie A.

Cikalleshi ka profilin e duhur për drejtuesit e Lecces të cilët kanë nisur kontaktet me agjentin e futbollistit dhe me Akhisarspor. Vetë lojtari nuk dëshiron të luajë në ligën e dytë të futbollit turk dhe kërkon largimin, kështu Lecce do të ishte skuadra perfekte për 29-vjeçarin për të treguar vlerat e vërteta të tij.

Sipas mediave italiane për kuqeziun interesohen edhe disa klube të ligës së parë franceze, mbetet për t’u parë se ku do ta vazhdojë karrierën Cikalleshi. Në sezonin e fundit në Turqi, Cikalleshi shënoi 8 gola në 29 ndeshje dhe nuk përjashtohet mundësia që në ditët në vijim ta shohim protagonist në Seria A.