Kombëtarja e femrave/ Sinani: Me Shqipërinë do ta kenë të gjithë vështirë!

Trajneri Kombëtares shqiptare të femrave, Vioresin Sinani, ka dalë ditën e sotme në konferencë për shtyp, për të publikuar listën e lojtareve në prag të ndeshjes së parë kualifikuese për Kampionatin Europian të vitit 2021.

Shqipëria fillon më datë 2 Shtator në “Elbasan Arena” kualifikueset për Grupin E, ku kemi edhe Skocinë, Portugalinë, Finlandën dhe Qipron. Në konferencën e sotme për shtyp, trajneri Sinani u shfaq optimist përpara debutimit në eliminatore, duke theksuar se skuadra e kishte bindur dhe në ndeshjet miqësore që zhvilluan me Maqedoninë e Veriut në muajin Qershor.

“Jemi në prag të ndeshjes me Finlandën. Kemi një grup relativisht të vështirë sepse Finlanda, Skocia dhe Portugalia janë ekipe elitare në futbollin europian dhe botëror të femrave. Në grup kemi dhe Qipron, një kundërshtar i kalueshëm. Për këtë ndeshje të parë kemi menduar të thërrasim një grup prej 18 lojtaresh. Kemi afruar edhe 3-4 vajza nga skuadra U-19 e edicionit të kaluar dhe të cilat gradualisht besoj se do të arrijnë të përshtaten me ekipin dhe do të jenë një pikë e fortë në vitet në vijim.

Po mundohemi të rinovojmë skuadrën, duke gërshetuar elementet e rija me elementet me përvojë. Në lidhje me ndeshjen me Finlandën them që është një ndeshje e fortë, skuadrat skandinave janë të forta dhe kanë një zhvillim të madh te futbolli femrave, por ne kemi një ekip simpatik, një ekip solid, që në ndeshjet e fundit miqësore është paraqitur shumë mirë. Besoj shumë te vajzat që të marrim një rezultat pozitiv. Në këto ditë grumbullim, së bashku me vajzat do të studiojmë ndeshjet e tyre. Kemi parë si staf ndeshjen e tyre të fundit, janë një skuadër me përgatitje të mirë fizike. Kam besim që do të paraqitemi shumë mirë, në dispozicion janë vajza që nuk dorëzohen kurrë dhe japin maksimumin e shpirtin në fushën e lojës.

Unë jam i kënaqur nga të gjithë vajzat, edhe nga ato vajza që vijnë nga jashtë. Besoj se është një grup i mirë dhe një grup që unë e vlerësoj sepse japin gjithmonë maksimumin në çdo ndeshje. Ekipi do i injektojmë egon dhe shpirtin e garës për 90 minuta. Do të luajmë me skemat që kemi përdorur zakonisht. Nëse ekipin jep maksimumin në fushën e lojës, çdo skuadër do e ketë të vështirë kundër nesh. Jam i kënaqur dhe nga dy testet që kemi zhvilluar me Maqedoninë në Qershor. Kur ekipi më jep më të mirën, vrapin, forcën dhe luftën që ka, trajneri është shumë më i qetë. Unë besoj se Finlandës do ti vendosemi mirë në fushë, me një mbrojtje të fortë, me një mesfushë të kujdeshme, duke luajtur me kundersulme. Unë jam i bindur se do të përfaqësohemi mirë”.