Milani nuk heq dorë nga Armando Broja, ka gati planin për ta rrëmbyer

Armando Broja është duke u rikuperuar nga dëmtimi i rëndë që pësoi sezonin e fundit. Dëshira e Brojës ka qenë dhe mbetet e njëjtë, të bëj vend te Chelsea, klub ku është rritur, me të cilin ka një kontratë deri në qershor 2028.

Pavarësisht këtij fakti, emri i Brojës mbetet në listën e dëshirave të klubeve europiane, ku adhuruesit në Premier League dhe Seria A nuk mungojnë.

“Tuttosport” shkruan se Broja është një objektiv i Milanit në këtë merkato vere. Në fakt, Broja është një emër që lidhet në mënyrë konstante me një kalim në “San Siro”, “djalli” u përpoq ta joshte edhe gjatë verës së shkuar pasi kishte mbyllur një sezon fantastik me Southampton.

Milan nuk e ka luksin të investojë minimumi 30 milionë euro për të blerë kartonin e Brojës, por opsioni për ta transferuar në formë huazimi duket ideali për të dy klubet, gjithnjë nëse Pochettino nuk bindet gjatë fazës përgatitore.