Monchi jep dorëheqjen nga Roma, Ranieri firmos për 3 muaj!

Pas Eusebio Di Francescos nga Roma largohet zyrtarisht edhe drejtori sportiv Monchi. Ky i fundit ishte kundër shkarkimit të Di Francescos dhe pas konfrontimeve që ka patur me drejtuesit të tjerë të klubit, ka paraqitur dorëheqjen e tij duke zgjidhur me konsesus marrëveshjen dhe duke u larguar zyrtarisht nga verdhekuqtë.

Vendin e Monchit si drejtor sportiv e ka marrë Frederic Massara, ndërkohë që në krisjen mes spanjollit dhe klubit ndikoi vendimi i Tottit për t’i besuar stolin Claudio Ranierit pa marrë më parë mendimin e Monchit.

Trajneri italian ka mbërritur sot në kryeqytet për aventurën e tij të dytë te Roma teksa ka drejtuar edhe stërvitjen e parë. Ranieri ka firmosur me verdhekuqtë për 3 muaj ndërsa në të ardhmen mund të ketë një rol në kastën drejtuese të Romës.