Neymar: Vuajtëm ndaj Meksikës, por do të shkojmë larg! (VIDEO)

Neymar ishte njeriu i ndeshjes në fitoren 2-0 që Brazili arriti ndaj Meksikës, duke u kualifikuar për në çerekfinalet e Kupës së Botës 2018. Sulmuesi i kombëtares “seleçao” shënoi një gol dhe dhuroi një asist për shokët e tij, duke qenë arkitekti i një suksesi shumë të rëndësishëm.

“Dua të përgëzoj të gjithë skuadrën, pasi kemi luajtur mjaft mirë, si rrallëherë kohët e fundit. Kjo punë e mirë kolektive solli këtë rezultat. Patëm disa momente ku vuajtëm, pasi Meksika është një rival i fortë, një skuadër e komplikuar për t’u përballur, me cilësi në përbërjen e saj.

Por ne treguam se kemi më shumë cilësi se Meksika, se jemi një ekip më i përgatitur. Nga ndeshja në ndeshje po bëhemi më kompakt, jemi në çerekfinale dhe kemi mundësi të shkojmë akoma më larg”, deklaroi Neymar pas ndeshjes.