Pezullohet kampionati dhe merkato në Kinë për shkak të Coronavirusit

Coronavirusi “infekton” edhe futbollin. Rreziku i përhapjes së epidemisë së virusit vdekjeprurës ka detyruar Federatën Kineze të Futbollit të marrë vendimin drastik për të pezulluar të gjitha ndeshjet e futbollit të programuara në vitin 2020. Në komunikatën zyrtare të qeverisë së futbollit kinez shkruhet:

“Në kuadër të bashkëpunimit për të parandaluar dhe kontrolluar epideminë e coronavirusit dhe për të mbrojtur shëndetin e tifozëve, pjesëtarëve të medieve, lojtarëve, trajnerëve pezullohen të gjithë ndeshje e futbollit në vend.”

Orët e fundit, për të shmangur infektimin e mundshëm nga coronavirusi, është bllokuar edhe merkatoja e futbollistëve në Kinë. Kujtojmë që ky treg i ri tërheq emra të rëndësishëm të futbollit europian dhe jo vetëm, për shkak të kontratave të majme.

Shumë prej tyre, të frikësuar nga situata e krijuar në vendin aziatik, kanë kërkuar të mbyllin para kohe kontratat, edhe pse do të ishin të detyruar të hiqnin dorë nga shuma të rëndësishme.