Plas keq te Napoli, futbollistët kryengritje ndaj Ancelotti-t dhe drejtuesve

Kaos total në shtëpinë e Napolit, pas kryengritjes së futbollistëve në përfundim të ndeshjes së Championsit ndaj Salzburgut, që nuk pranuan të shkonin në grumbullim, por iu drejtuan banesave të tyre pa autorizimin e drejtuesve më të lartë të klubit.

“La Republica” rindërton ngjarjet që pasuan vërshëllimën e trefishtë të kryesorit, me futbollistët që iu drejtuan dhomave të zhveshjes, ndërsa presidenti De Laurentiis ishte larguar nga “San Paolo”.

Pikërisht pas barazimit me ekipin austriak, futbollistët e Napolit, të drejtuar nga Lorenzo Insigne, janë përballur me tone të ashpra me zëvendëspresidentin e skuadrës, Edoardo De Lauentiis: “Ne po kthehemi në shtëpitë tona, thuaja edhe babait tënd…”

“Çfarë do të ndodhë tani?”, ngre pyetjen e përditshmja italiane. Tani topi kalon te presidenti (i cili ende nuk ka reaguar për gjithçka ka ndodhur), autoriteti drejtues i të cilit është vënë në diskutim nga Insigne dhe shokët e tij, që minimalisht rrezikojnë një gjobë të majme.