Ronaldo shpëton Juventusin me dopietë nga humbja ndaj Romës (VIDEO)

Juventusi i Pirlos bën ndalesën e parë që në javën e dytë në Seria A kundër Romës. Në “Olimpico” kampionët e Italisë nuk shkuan më shumë se një barazim 2-2, edhe pse për gati një pjesë lojë luajtën me një futbollist më pak.

Fillimi i ndeshjes ishte më i mirë për Romën që arriti të kalonte e para në avantazh. Rabiot shkaktoi penallti në minutën e 31-të pas një prekje të topit me dorë. Nga pika e bardhë Jordan Veretout tregohet i saktë, duke arritur që të mposhtë portierin Wojciech Szczęsny, i cili e prek topin, por pa mundur ta ndalë.

Juventus reagon menjëherë, teksa në fundin e fraksionit të parë fiton një penallti me Ronaldon që do të kthehej po vetë në gol nga portugezi. Pjesa e parë solli të tjera emocione, teksa pas një kundërsulmi të shpejt Veretout dërgoi për herë të dytë topi në rrjetë pas një pasimi fantastik të Mkhitaryan.

Në pjesën e dytë Pirlo bën një lëvizje të gabuar duke nxjerrë nga fusha McKennie dhe duke mbajtur Rabiot, por francezi do të merrte shumë shpejt kartonin e dytë të verdhë duke lënë skuadrën me 10 futbollistë për pjesën e mbetur të ndeshjes.

Në minutën e 69-të, Juventus arrin që të shënojë sërish me Ronaldon. CR7 kërcen mjaft mirë në ajër duke e dërguar “sferën” në kuadrat. Në minutat e mbetura Roma është më kërkuese, ndërkohë që bardhezinjtë më shumë u mbrojtën nga pësimi i një goli. /R.Lika-Koha Jone/